ქვეწარმავალი წარმატების გზაზე

[ლაშა]

      წარმატების ფენომენის განხილვა ჩემს ბლოგზე მაინცდამაინც ახალი ამბავი არ არის. რამდენჯერმე უკვე ჩავჯღაპნე იმის შესახებ, როგორ სხვადასხვაგვარად ესმით წარმატება ადამიანებს და ზოგჯერ რომელია უპირატესი წარმატება, როგორი უნდა იყოს წარმატებული და ა.შ. ის ფაქტი, რომ წარმატების რაობის კვლევებიც ტარდება, სადღაც ნათქვამი მაინც მექნება. მინიმუმ, ახლა რაც კარგად მახსენდება, ესაა ორი პოსტი წარმატებაზე, ერთი - უხეირო წარმატება და მეორე ალოგიკურობაზე.

      ყველასთვის თითგასაშვერი სტივ ჯობსი და მისი გამდიდრების ისტორია, ადვილად დაინგრა მისი მუშა ხელის წარმოჩენით. ალბათ, სხვა ბევრი ფილმი იქნება ამ თემაზე, მაგრამ მე რამდენიმე დღის წინ ნანახი Nightcrawler მინდა გაგიზიაროთ. ქართულად თარგმნეს როგორც "ღამის ქვეწარმავალი". მართლაც რაღაც, ღამის მუხლუხოა, ხოჭო, პარაზიტი.

      ფილმი 2014 წელს გამოვიდა. ნომინირებული იყო ოსკარზეც საუკეთესო სცენარისა და ორიგინალური სიუჟეტის გამო, მაგრამ ნომინაცია ნომინაციად დარჩა. ასევე ოქროს გლობუსა და ბაფთაზე წარადგინეს. მაინცდამაინც მოსაშორებელი ფილმი არა.

      რეჟისორი დენ გილროი, მთავარ როს ასრულებს ცაციას და დონი დარკოს ვარსკვლავი, ჯეიკ ჯილენჰოლი. თომას კროუნის აფიორის მთავარი ხორცისშემსხმელი რენე რუსოც აქ რის.

      ძალიან მოკლედ გეტყვით ფილმის მთავარ სათქმელს და მერე თქვენ გადაწყვიტეთ ღირს თუ არა ფილმის ნახვა.

      როგორც წესი, მრავალს მოსწონს უცბად გამდიდრებული ადამიანების ისტორიები, მძიმე შრომით, ღამისთენებით და ა.შ. ამ ფილმში სწორედ ასეთი ადამიანის ისტორიაა, ოღონდ რეჟისორმა სხვა უმნიშვნეოვანესი დეტლებიც გაითვალისწინა. მაგალითად, ის, რომ მთავარი გმირი არაშემოქმედებითი გონებისაა და უსწავლელი, ის მხოლოდ საჭირო, გამოსადეგ, უფრო მძაფრად ვიტყვი, გამოსაყენებელ, მოსახმარ უნარ-ჩვევებს ეცნობა და ადვილად ითვისებს. სჭირდება რომ გაყიდოს მესერი, იცის, მესერი სად იშოვოს, როგორ დაჭრას და როგორ ივაჭროს. ამის შემდეგ, სხვა სამსახურსაც ასე "იშოვის", საბოლოოდ კი, ყურს მოკრავს ერთ-ერთ საქმიანობას, რომელიც სხვებმა მოიფიქრეს, სხვებმა შეისწავლეს, ამან მხოლოდ, მზამზარეულზე მიიღო მცირე ინფორმაცია, წავიდა და შეუდგა იგივე საქმის კეთებას, ოღონდ განსხვავება ის იყო, რომ ჩვენი გმირი უფრო მეტზე წამსვლელი აღმოჩნდა ვიდრე სხვები. უფრო მძაფრად გაწყვიტა შუბლის ძარღვი და უფრო მეტად ჩააკმედინა ხმა, საკუთარ სინდისის ხმას, ამის წყალობით ის ღამეში 50 000, 100 000, ნახევარ მილიონ დოლარს შოულობს.

      ე.ი. ორი პუნქტი უკვე გვაქვს:

1. სხვისი შემოქმედებით სარგებლობა;
2. სხვებზე უფრო მეტად უნამუსობა;

      წარმატებას მარტო მაინც ვერ მიაღწევ, საჭიროა კომპანიონები, თანამშრომლები. ასეთ დროს მნიშვნელოვანია იაფი, უიაფესი მუშა ხელი. მაშინ როდესაც თავად 1 დოლარის და ცენტების გამო, მუხლებზე დამხობილი ევედრებოდა "პრარაბს" ჩემი მესერი მიიღეო, რამდენიმე კვირის შემდეგ, როდესაც შემოსავალი ღამეში 15 000 ჰქოდა და უკვე თანამშრომელი, ერთადერთი დაქირავებული მუშაკი ჰყავდა, ამ უკანასკნელს, 30 დოლარიანი ხელფასი, 75 დოლარამდე გაუზარდა და დაგაწინაურეო უთხრა.

      ასეა, ჩვენ რომ მოგვწონს უცბად წარმატებული ადამიანები, მათი ცხოვრება ხშირად, სწორედ ისეთია, როგორც ღამის ქვეწარმავლისა. აუცილებლად ნახეთ ეს ფილმი და მერე იქნებ გადააფასოთ ბევრი რამ!