გამოძიება შოვის ტრაგედიაზე, ელჩი და მოძალადეობა

[Giorgi]

ამ აგრილებულ საღამოს ლეგენდამ დაგვტოვა - ტოტო კუტუნიო 80 წლის ასაკში, მილანში, ჰოსპიტალში გარდაიცვალა. აგვისტო იწურება და დღის მთავარ ამბებში მიშას პოლიტიკური დაბრუნება, შოვის ტრაგედიის გამოძიებები, ამერიკის ელჩთან ბრალ-აპოლოგეტიკა და უკრაინის გახანგრძლივებული ომია. დღეს 1 აშშ დოლარის ოფიციალური ღირებულება 2.6215 ლარია.

საქართველოს და მსოფლიოს ამბები | 22 აგვისტო, 2023

პანდემია პოსტ - ამირან გამყრელიძე - მთავარი რეკომენდაციაა, ანალიზი ჩატარდეს, რა ვისწავლეთ პანდემიის დროს და როგორ უნდა მოვემზადოთ ახალი საფრთხეებისთვის - შესაძლოა, მსგავსი გამოწვევები განმეორდეს ახალი შტამების გამოჩენით, გლობალური დათბობით ან კლიმატის ცვლილებით. ამირან გამყრელიძე - უფრო მეტი ყურადღებაა საჭირო EG.5 ქვეშტამის და კორონავირუსის მიმართ - მოსახლეობას უნდა ჰქონდეს ინფორმაცია, თუ რა ხდება კოვიდთან დაკავშირებით, სტატისტიკა უნდა ქვეყნდებოდეს კვირაში ან თვეში ერთხელ.

საარჩევნოდ მიშა გისმენთ! - მიხეილ სააკაშვილი - თანამედროვე ქვეყნის აშენება შეუძლებელია მისი უდიდებულესობა ქართველი ხალხის გარეშე - მზად ვარ, მოვისმინო თქვენი პრობლემები და იდეები, მომაწოდეთ თქვენი ნააზრევი, თუ როგორ სახელმწიფოდ უნდა იქცეს საქართველო. ლევან ხაბეიშვილი - იმ პირობებში, როცა მთავარი ოპოზიციური პარტიის ლიდერი ციხეშია, თავისუფალ არჩევნებზე ლაპარაკი არის ანეკდოტი - მიხეილ სააკაშვილი უნდა იყოს თავისუფალი და შეეძლოს საარჩევნო პროცესში ჩართვა. ნინო დოლიძე - არჩევნების სრული სურათის სანახავად, სასურველია საერთაშორისო მისიები პროცესს 6 თვის განმავლობაში აკვირდებოდნენ - ჩვენ წინასაარჩევნო პერიოდის მონიტორინგს ადრე, 2024 წლის დასაწყისიდან დავიწყებთ.

საპენსიო ჯიბე - ანა დოლიძე - საპენსიო სააგენტოს ხელაღებული ქცევა ჩვენი ხალხის მიმართ მიუღებელია.

შავი ზღვა ისევ „ნორმალურია“ - გარემოს ეროვნული სააგენტო - 5 და 9 აგვისტოს ჩატარებული მონიტორინგის შედეგების მიხედვით, შავი ზღვის წყლის ხარისხი ნორმის ფარგლებშია.

შოვის ტრაგედია - ონის მერის მოადგილის განცხადებით, შოვში, სტიქიის ზონის პერიმეტრი სრულად დამუშავებულია. 29 ცხედარია ნაპოვნი. შოვში, სტიქიის ზონაში ნაპოვნი 29-ე გარდაცვლილი ბავშვია. ლაშა ფარულავა - შუალედური დასკვნა, რომელიც „ნაციონალურმა მოძრაობამ“ შოვის ტრაგედიაზე მოამზადა, მაღალი პოლიტიკური თანამდებობის პირების მხრიდან დანაშაულებრივ გულგრილობასა და უმოქმედობაზე მიუთითებს. „ნაციონალური მოძრაობის“ ანგარიში - არსებობს ინფორმაცია, რომ შოვში სტიქიის დღეს, მაღალი თანამდებობის პირები, სუს-ის იუბილეს აღსანიშნავად, მცხეთაში, რესტორანში იმყოფებოდნენ, რაც შესაძლოა, კავშირში იყოს დაგვიანებულ რეაგირებასთან. ზაზა გოგავა - ხელისუფლებისთვის მოქალაქეების სიცოცხლე და უსაფრთხოება არ არის პრიორიტეტი და ყველა განცხადება, რომელიც თანამდებობის პირებმა გააკეთეს, შოვის ტრაგედიის გადაფარვას ემსახურება. ლევან ხაბეიშვილი - სტიქიის ზონებში, დიახ, ე.წ. ვალინკებით ჩავდივარ და ბახილებით არ მივდივარ. გრიგოლ გეგელია - „ქართული ოცნება“ ვერ გაექცევა პოლიტიკურ პასუხისმგებლობას ათობით უდანაშაულო ადამიანის ტრაგიკულ აღსასრულზე, განურჩევლად იმისა თუ რა ცილისმწამებლურ ხრიკებს მიმართავენ. გივი მიქანაძე - შოვში, პირველივე წამიდან იყო რეაგირება, რადიკალური ოპოზიცია კი ცდილობს ტრაგედია პოლიტიკური ქულებისთვის გამოიყენოს - „ნაციონალურ მოძრაობას“, რომელიც უფსკრულისკენ მიექანება, მორალი არ აქვს.

მეცნიერი ძალადობაში - „რუსთავი 2-მა" გაავრცელა ინფორმაცია, რომლის მიხედვითაც თეა გოდოლაძეს, დედამიწის შემსწავლელ მეცნიერებათა ინსტიტუტისა და სეისმური მონიტორინგის ეროვნული ცენტრის დირექტორს, ბრალი წარუდგინა 126-ე პრიმა მუხლით, რაც ოჯახის წევრის მიმართ ძალადობას გულისხმობს. მათივე ცნობით, ამჟამად თეა გოდოლაძეს 2 000 -ლარიანი გირაო აქვს შეფარდებული, ხოლო საქმე სასამართლოში განიხილება.. თეა გოდოლაძე - ჩემმა ყოფილმა პარტნიორმა ჩემ წინააღმდეგ შეთითხნა ცრუ ბრალდებები, მისი გასაჯაროებით კი ხელისუფლება ცდილობს გამაჩუმოს - ჩემი შანტაჟი პირადი ცხოვრებით არ გამოგივათ! არ გავჩუმდები!

ამერიკელი ელჩი - ლევან ხაბეიშვილი - ნებისმიერი ტექნოლოგიური წინსვლის არჩევნებში გამოყენება კარგია მაშინ, როცა ხელისუფლება არ არის გამყალბებელი და ქურდი - კელი დეგნანის განცხადება მიანიშნებს იმაზე, რომ „რუსულ ოცნებას“ ქვეყნის გარეთ განაჩენი გამოტანილი აქვს. რატი იონათამიშვილი ადამ კინზინგერზე - ასეთი არაკომპეტენტური და საკუთარი პარტიიდან გარიცხული ადამიანის სპიკერად მოშველიება, თუ ვინმეს ჰგონია, რომ კარგი საქმეა, ასეთი სპიკერი მშვიდობაში მოახმაროს. გივი მიქანაძე - კელი დეგნანის განცხადებები დეპოლარიზაციას კი არ ამცირებს, პოლარიზაციას ზრდის, რაც არ არის ელჩის ფუნქცია - რაც შეეხება ადამ კინზინგერს, მის სულელურ ნარატივზე აყოლას არ ვაპირებ. ბექა ლილუაშვილი - გუშინ ვიხილეთ ფეხების ბაკუნი მომავალი ელჩისთვის - ხელისუფლების გაღიზიანების მესმის, რადგან არჩევნების შედეგებზე ზემოქმედების მოხდენა აქვს განზრახული. თინა ბოკუჩავა - როცა ივანიშვილის პაიკი აშშ-ის ელჩს თავს ესხმის სამარცხვინო, მდაბიო ტერმინოლოგიით, ეს ადასტურებს, რომ ის არის რუსული რეჟიმის დავალების შემსრულებელი.

ვადაგახანგრძლივებული ტკბილეული - საგამოძიებო სამსახურმა პასუხისგებაში მისცა ორი პირი, რომელიც სხვადასხვა დასახელების უცხოური წარმოების ვადაგასულ შოკოლადს ახალი ვადის აღმნიშვნელ სტიკერებს აკრავდა და მის რეალიზაციას თბილისის სავაჭრო ქსელში ახდენდა.

ბავშვებზე ძალადობა - 2023 წლის 6 თვეში, სახელმწიფო ზრუნვისა და ტრეფიკინგის მსხვერპლთა სააგენტოში ბავშვთა მიმართ ძალადობის 793 შემთხვევაზე შევიდა შეტყობინება, საიდანაც ძალადობა 171 ფაქტზე დადასტურდა. 6 თვის მონაცემებით, საქართველოში გასაშვილებელი სტატუსის მქონე 146 ბავშვია, მშვილებელ პირთა რაოდენობა კი 2153-ს შეადგენს.

საზღვარგარეთულები:

გახანგრძლივებული ომი - ჯოზეფ ბორელის განცხადებით, უკრაინაში მშვიდობის მიღწევის საკითხთან დაკავშირებით, ევროკავშირი უმაღლესი დონის შეხვედრაზე მუშაობს. რუსეთის თავდაცვის სამინისტრო - მოსკოვსა და ბრიანსკის ოლქებში კიევის რეჟიმის ტერაქტების მცდელობა აღიკვეთა, განადგურებულია 4 დრონი. პენტაგონი - აშშ მზადაა, უკრაინელი მფრინავების F-16-ებზე წვრთნაში ჩაერთოს, მაგრამ არსებობს პირობა. რუსებმა კრივი-რიჰი დაბომბეს, დაზიანდა 20 სახლი. სამხრეთ-აღმოსავლეთ ევროპის 11 ქვეყნის ლიდერებმა ათენში გამართულ სამიტზე უკრაინის ტერიტორიული მთლიანობის მხარდაჭერის შესახებ დეკლარაცია მიიღეს. აშშ-ს სახელმწიფო დეპარტამენტმა პოლონეთისთვის Apache-ს საბრძოლო ვერტმფრენების მიყიდვას მხარი დაუჭირა. უკრაინელებმა რაბოტინოში შეაღწიეს, მიმდინარეობს უკრაინელების ევაკუაცია. ვოლოდიმირ ზელენსკი სერბეთის პრეზიდენტს შეხვდა. ოლექსი რეზნიკოვი - რა იარაღს ველოდებით ჯერ კიდევ? პრიორიტეტები არ შეცვლილა - ნომერ პირველი პრიორიტეტია საჰაერო თავდაცვა, მეორე პრიორიტეტი კი ჭურვები, ჭურვები და კიდევ ჭურვები. ოლექსი დანილოვი - ყირიმის გათავისუფლება დიდი ალბათობით, სამხედრო გზით მოხდება, რადგან სხვა გზა არ გვაქვს - ყირიმის დეოკუპაციის გარეშე ომი დასრულებულად ვერ ჩაითვლება. ურსულა ფონ დერ ლაიენი - მხარს ვუჭერთ უკრაინის მცდელობას, შეაკეთოს, აღადგინოს და შეინარჩუნოს სახელმწიფო - დღეს უკრაინას ახალი, 1.5 მილიარდი ევრო გადავუხადეთ, უფრო მეტი იქნება წელს და მის შემდეგ. კირილ ბუდანოვი - ყირიმში ოკუპანტების განადგურების ახალ შემთხვევებს ამ დღეებში ნახავთ. ვოლოდიმირ ზელენსკი - სახლში ახალი პოლიტიკური მხარდაჭერით, ახალი შეთანხმებებით ვბრუნდებით - ბოლო ვიზიტების შედეგად უკრაინა თვითმფრინავებს, დამატებით ჯავშანტექნიკას მიიღებს და საჰაერო თავდაცვას გააძლიერებს.

მოგზაურობა - ევგენი პრიგოჟინი ვიდეომიმართვას ავრცელებს და აცხადებს, რომ აფრიკაშია. სერგეი ლავროვი სამხრეთ აფრიკაში ჩავიდა, სადაც BRICS-ის ქვეყნების სამიტი ჩატარდება.

ბელორუსიის ამბავი - აშშ საკუთარ მოქალაქეებს ბელარუსის დაუყოვნებლივ დატოვებისკენ მოუწოდებს. ტრამპნიუსი - დონალდ ტრამპი - მივდივარ ატლანტაში, რათა რადიკალმა მემარცხენე პროკურორმა დამაკავოს. მოირიგებლები - აზერბაიჯანი-სომხეთის საზღვარზე აზერბაიჯანელი ჯარისკაცი დაჭრეს.

წყაროები: ქართული ინტერნეტ საინფორმაციო პორტალები

◄ წინა ამბები

მომდევნო ამბები ►