შემოდგომაზე დათვლილი ხმები და მეორე ტურები

[Giorgi]

      არჩევნებმა ყველა სხვა ამბავი გადაფარა - კოვიდიც აღარავის ახსოვს და შესაბამისად არც არავინ იტესტება, არც ვირუსდება და არც იცრება. არჩევნების შედეგებმა 20 ქალაქში მეორე ტური დანიშნა და ახლა კიდევ ერთთვიანი სამზადისი გველოდება წინ. დღეს სწავლა სკოლებში განახლდა და ქალაქი დილით პარალიზებული იყო - ყველა სკოლასთან საცობი წარმოიქმნა. ქვეყანაში შემოდგომის შედეგებს იმკიან და სააკაშვილის პატიმრობას განიხილავენ. ვალუტის კურსი - 1 აშშ დოლარი - 3.1411 ლარია.

საქართველოს და მსოფლიოს ამბები | 4 ოქტომბერი, 2021

      #კოვიდსაქართველო - საქართველოში კორონავირუსით ინფიცირების 867 ახალი შემთხვევა დაფიქსირდა, გარდაიცვალა კიდევ 30 პაციენტი.

      არჩევნების შედეგები და გამოხმაურებები: ყველა დიდ და თვითმართველ ქალაქში მეორე ტური გაიმართება -

• თბილისის შედეგები: კახა კალაძე - 216363 ხმა (45.06 %) - ქართული ოცნება, ნიკანორი მელია - 163003 ხმა (33.95 %) - ნაციონალური მოძრაობა;
• ქუთაისის შედეგები: ხატია დეკანოიძე 28325 ხმა (43.34%) - ნაციონალური მოძრაობა; იოსებ ხახალეიშვილი - 27092 ხმა (41.45) ქართული ოცნება;
• რუსთავის შედეგები: ნინო ლაცაბიძე - 22333(44.8%) - ქართული ოცნება, დავით კირკიტაძე 21706 ხმა (43.54%) - ნაციონალური მოძრაობა;
• ბათუმი - გიორგი კირთაძე 31443 ხმა (41.97%) - ნაციონალური მოძრაობა, არჩილ ჩიქოვანი - 30776 ხმა (41.08%) - ქართული ოცნება;
• ფოთი - ბექა ვაჭარაძე 9606 ხმა (46.86%) ქართული ოცნება, გიგი უგულავა - 7809 ხმა (30.09%) ნაციონალური მოძრაობა.

აშშ-ს საელჩო - მოვუწოდებთ პარტიებს, სიტუაციის შემდგომი პოლარიზაციის მცდელობებისგან თავის შეკავებისკენ, მეორე ტური არის შესაძლებლობა, რომ პროცესი გაუმჯობესდეს. არჩევნების მონიტორინგის ორგანიზაციათა ევროპული ქსელის წარმომადგენელი - სამართლებრივი ჩარჩოს ცვლილება არჩევნებამდე ცოტა ხნით ადრე, არ არის რეკომენდებული პრაქტიკა, განსაკუთრებით მაშინ, როცა ცვლილებები არსებითი ხასიათისაა. ENEMO-ს მისიის ხელმძღვანელი - დამკვირვებლებმა დააფიქსირეს პარტიული აქტივობები გარკვეულ საარჩევნო უბნებზე - საარჩევნო კამპანიას თან სდევდა ამომრჩევლების და კანდიდატების მიმართ დაშინება და ზეწოლა. ENEMO-ს ანალიტიკოსი - პროცედურები უმეტესწილად დაცული იყო, თუმცა დაფიქსირდა ხმის მიცემის საიდუმლოების დარღვევის მაგალითები. აშშ-ს საელჩოს განცხადებით, ბევრ ქალაქსა და სოფელში მასწავლებლების, სამართალდამცველების და საჯარო სექტორის თანამშრომლების მიმართ ზეწოლამ, ხელი შეუშალა მათ თავისუფალი არჩევანის გამოხატვაში. ENEMO-ს წარმომადგენელი - თანამდებობის პირები მონაწილეობდნენ მმართველი პარტიის კამპანიაში, რამაც უპირატეს მდგომარეობაში ჩააყენა მმართველი პარტია და ბუნდოვანი გახადა ხაზი სახელმწიფოსა და პარტიას შორის. მიხეილ სარჯველაძე - დარღვევებთან დაკავშირებით აშშ-ს საელჩოს განცხადებაში მითითებული შეფასებები ცოტა გაზვიადებულია. გიგი უგულავა - ამდენი ფალსიფიკაციის და ძალადობის ფონზე „ოცნება“ კარგავს კონტროლს ქვეყნის დიდ ქალაქებზე, ხოლო სამეგრელოში მთლიანად გაბანკროტებულია. ბათუმში „ნაცმოძრაობის“ მერობის კანდიდატი გიორგი კირთაძე - საკრებულოში უმრავლესობა ოპოზიციას აქვს და თავმჯდომარეც ოპოზიციონერი იქნება - ბათუმი „ოცნებამ“ წააგო. ნიკა ობოლაძე - მეორე ტურში ჩვენ მზად ვართ ვითანამშრომლოთ ოპოზიციასთან - ჩვენ ვირჩევთ, თანამშრომლობას ცვლილებებისთვის. ირაკლი ზარქუა - არჩევნების მეორე ტურს ყველგან მოვიგებთ, მაგრამ თუ განსხვავებული პოზიცია დაფიქსირდა, არც ესაა პრობლემა - მზად ვართ ყველასთან ვითანამშომლოთ. „სამართლიანი არჩევნების“ მიერ ხმების პარალელური დათვლის მიხედვით, კახა კალაძემ ხმების 45,2%, ნიკა მელიამ კი 34% მიიღო. იაგო ხვიჩია - ჩვენი თავი გაგვჭირვებია, არ ვართ ახლა იმ სიტუაციაში, რომ ამომრჩეველს მოვუწოდოთ, ვინმეს ხმა მისცეს ან არ მისცეს. გიგი წერეთელი - „ქართულმა ოცნებამ“ უნდა გაითვალისწინოს ამერიკის საელჩოსა და საერთაშორისო სადამკვირვებლო მისიების მიერ აღნიშნული მძიმე დარღვევები. დავით ზალკალიანი - არჩევნების ლეგიტიმურობასთან დაკავშირებით არსად კითხვის ნიშანი არ არის. „მესამე ძალა - სტრატეგია აღმაშენებელი“ მეორე ტურში ამომრჩევლებს ოპოზიციონერი კანდიდატების მხარდაჭერისკენ მოუწოდებს. დავით კირკიტაძე - რუსთავის საკრებულო არის ოპოზიციური. ბადრი ჯაფარიძე - სააკაშვილის ჩამოსვლამ და დაკავებამ ძალიან დიდი ზეგავლენა იქონია შედეგებზე - 1-ელ ოქტომბრამდე შანსი არ ჰქონდა „ქართულ ოცნებას“ 43% მოეპოვებინა. შარლ მიშელი - სასიცოცხლოდ მნიშვნელოვანია, რომ ახლა ქვეყნის ყურადღება დაუბრუნდეს სიღრმისეულ სტრუქტურულ რეფორმებს, როგორც ეს 19 აპრილის შეთანხმებაშია გაწერილი.

      სწავლა სკოლაში - მიხეილ ჩხენკელი - მთელი გულით ვულოცავ პირველკლასელებს პირველ ნაბიჯებს სკოლის ცხოვრებაში და წარმატებებს ვუსურვებ მათ.

      სააკაშვილი ციხეში - სასამართლო იმ პირის აღკვეთის ღონისძიების შეფარდებაზე იმსჯელებს, რომლის ბინაშიც მიხეილ სააკაშვილი დააკავეს. მიხეილ სააკაშვილის საქართველოში შემოყვანის საქმეზე კიდევ ორი პირი დააკავეს. ლია მუხაშავრია განმარტავს, არსებობს თუ არა სამართლებრივი საფუძვლები მიხეილ სააკაშვილის უკრაინაში ექსტრადირებისთვის და მოუწევს თუ არა ყოფილ პრეზიდენტს პატიმრობა კიევშიც. ელგუჯა ცომაიას, რომლის ბინაშიც მიხეილ სააკაშვილი იმყოფებოდა, შესაძლოა, ბრალი ყოფილი პრეზიდენტის საზღვარზე უკანონო შემოყვანის ფაქტზეც დაუმძიმდეს. ადვოკატი - ელგუჯა ცომაია არის პატრიოტი, პატიოსანი ადამიანი, რომელმაც დევნილი მესამე პრეზიდენტი, მიხეილ სააკაშვილი შეიფარა. ადვოკატი ელგუჯა ცომაიაზე - 63 წლის კაცი, რომელმაც მეუღლე ცოტა ხნის წინ დაკრძალა, მოსამართლემ გაამწესა ციხეში მხოლოდ იმის გამო, რომ მიხეილ სააკაშვილს უმასპინძლა. მიხეილ სარჯველაძე - როცა სააკაშვილი იყო ხელისუფალი, ყველა ფეხის ნაბიჯზე დანაშაულის ჩადენის ფაქტებს ვუყურებდით, მათ შეიძლება ეშინოდეთ, რომ გამოუაშკარავდეთ ბევრი დანაშაული. ENEMO-ს მისიის ხელმძღვანელის განცხადებით, სააკაშვილის დაბრუნებას განსაკუთრებული გავლენა არ მოუხდენია საარჩევნო პროცესზე. ირაკლი ზარქუა - მიხეილ სააკაშვილი დამსახურებულად ზის იქ, სადაც უნდა იჯდეს. იაგო ხვიჩია - მალე სააკაშვილს უკრაინაში “დაადეპორტებენ“ და საქართველოში კრება დარჩება მხიარული. ირაკლი კობახიძე - უამრავი დანაშაულის ჩამდენი პათოლოგიური ადამიანი, რომელიც 18 წელი მოსვენებას არ აძლევდა ამ ქვეყანას, დღეს ციხეშია. სააკაშვილმა სასჯელი ბოლომდე უნდა მოიხადოს და მოიხდის! თაკო ჩარკვიანი - რუსეთის მიერ დევნილი პრეზიდენტი არ უნდა გავასამართლებინოთ იმ მართლმსაჯულებას, რომელსაც საკუთარი შარდი არ ანდო გახარიამ. რუსთავის ციხესთან მიხეილ სააკაშვილის მხარდამჭერი აქცია მიმდინარეობდა. მიხეილ სააკაშვილი აქციის მონაწილეებს - მესმის თქვენი ხმა საპყრობილეში და ბრძოლის სურვილს მიათმაგებს, "ვაწვებით" გამარჯვებამდე. ხატია დეკანოიძე - საქართველოში დაბრუნება მიხეილ სააკაშვილისთვის უმნიშვნელოვანესია, უმნიშვნელოვანესია, რომ საქართველოს მოქალაქეებისთვის და მომავლისთვის იბრძვის. გიორგი ჩივიაშვილის განცხადებით, მიხეილ სააკაშვილი უკრაინაში ექსტრადირებაზე უარს იტყვის. დავით ზალკალიანი - ექსტრადირება ხდება მაშინ, თუ პირს ჩადენილი აქვს იმ ქვეყნის შესაბამისი სისხლის სამართლის დანაშაული - არ არის გამორიცხული, სააკაშვილს უკრაინის კანონმდებლობაც ჰქონდეს დარღვეული და საზღვარიც უკანონოდ ჰქონდეს გადაკვეთილი. მედია - უკრაინის სასაზღვრო სამსახურმა მიხეილ სააკაშვილის მიერ ქვეყნის დატოვების ფაქტზე სამსახურებრივი გამოძიება დაიწყო. მიხეილ სააკაშვილი - შიმშილობა იქნება ჩემი სიცოცხლის დასრულებამდე - წინასწარვე უარი განვაცხადე უგონოდ ყოფნის შემთხვევაში სამედიცინო ჩარევაზე. ე.წ. კორტების საქმეზე მსჯავრდებულებმა ირაკლი ფირცხალავამ და გიორგი ცააძემ მიხეილ სააკაშვილისთვის სოლიდარობის ნიშნად შიმშილობა დაიწყეს.

      საქართველოს პრემიერ-მინისტრმა და თურქეთის თავდაცვის მინისტრმა რეგიონული უსაფრთხოების საკითხები განიხილეს.

საზღვარგარეთულები:

      #კოვიდმსოფლიო - სომხეთში კორონავირუსის 627 ახალი შემთხვევა დაფიქსირდა, გარდაიცვალა კიდევ 25 ადამიანი. რუსეთში კორონავირუსის 25 781 ახალი შემთხვევა გამოვლინდა, გარდაიცვალა კიდევ 883 ადამიანი.

      კარიკატურისტი, რომელმაც მუჰამედის კარიკატურა შექმნა და რომლის მკვლელობისთვის „ალ-ქაიდას“ ჯილდოდ 100 000 აშშ დოლარი ჰქონდა დაწესებული, ავტოსაგზაო შემთხვევას ემსხვერპლა.

წყაროები: ქართული ინტერნეტ საინფორმაციო პორტალები

◄ წინა ამბები

მომდევნო ამბები ►