შემოქმედი მხატვარი

[ლაშა]

თვალებს ძლივს ახელდა დასაძინებლად რომ წავედით, მაგრამ მაინც მოვახერხეთ ძილისწინა საუბრები. ამჯერად, თემა ნათესავები და ნათესაური კავშირები იყო და ცოტა ვერ მიხვდა რა სხვაობა შვილიშვილსა და შვილთაშვილს შორის. ის კი გაიგო, რომ პირველი - მესამე თაობას ნიშნავდა, ხოლო მეორე - მეოთხეს, მაგრამ თვითონ ეს სიტყვები - შვილი-შვილი და შვილთა-შვილი რატომ მიეკუთვნებოდა სხვადასხვა თანრიგს, როცა ორივეში ორჯერაა ნახსენები შვილი, ეგ ვერ გაიგო და ვერც მე ვუპასუხე დამაჯერებლად. „ასეა და მორჩა“ - მოგეხსენებათ ეს პასუხი არ აკმაყოფილებთ მათ ასაკში.

ცდილობდა ძილისთვის არ დაეთო, მაგრამ ძლიერი მეტოქე აღმოჩნდა, ამიტომ რამდენიმეწამიანი პაუზებით მეკითხებოდა:

- მა, ისე, შეიძლება ადამიანს მუცელში ორი ბავშვი ჰყავდეს ერთად?

- კი მა, აი, გუშინ, სოფელში რომ თეკლა და ელენე იყვნენ, ეგენი ერთად ჰყავდა მუცელში დედას. მაგათ ჰქვიათ ტყუპები.

- ხო, ვიცი - მცირე პაუზა და შემდეგ - მა, შეიძლება ორი ბავშვი თავით მიწებებულები იყვნენ?

- კი მა, შეიძლება.

პაუზები კითხვებს შორის ნელ-ნელა იზრდებოდა.

- და მაგ მიწებებულებს მერე ოპერაციას უკეთებენ მიწებებულები რომ აღარ იყვნენ?

- კი. დააცალკევებენ.

- და ... - ისევ პაუზა, მაგრამ სიტყვა დაიტოვა - ეგენი მუცელში მიეწებნენ თუ რომ დაიბადნენ მერე?

- არა მა, მუცელშივე, ვერ ჩამოყალიბდა სწორად მათი სხეული.

ისევ რამდენიმეწამიანი დუმილი.

- ანუ ღმერთმა ეგრე შექმნა?

ამჯერად, მე დავდუმდი რამდენიმე წამით. მარტივად ვუპასუხო და ვუთხრა „კი“ ვაითუ მითხრას ეგრე რატომ მოექცაო, „არა“ და დამატებითი ახსნა-განმარტებები დასჭირდება, არადა ერთი სული მაქვს დაიძინოს.

- არა მა, - მაქსიმალურად ნელა და ჩუმად ვეუბნები - ღმერთმა არ შექმნა ეგრე, უბრალოდ, ღმერთმა ხელი არ შეუშალა ეგეთები დაბადებულიყვნენ - ბუნდოვნად ვპასუხობ, იმის იმედად რომ დაეძინება.

ხანგრძლივი დუმილი. მე უკვე დარწმუნებული ვარ, რომ ჩაეძინა. 

- ანუ ღმერთმა ვერ დახატა კარგად?

- რა ვერ ქნა?

- აი, ღმერთი ხო ქმნის ყველა ადამიანს და ეგენი ვერ დახატა სწორად ცალ-ცალკე?

მაშინ კი მივხვდი, ვერ ავცდებოდი გრძელ პასუხს.

- ღმერთმა სწორად დახატა მამი, უბრალოდ, მერე ადამიანებმა აურიეს რაღაც. შეიძლება, სიგარეტს ეწეოდა მათი დედიკო, ან ალკოჰოლს სვამდა ან რამე შეემთხვა, ავარია ან რამე და გარედან დაზიანდა, ასე ხდება ხოლმე, ხომ გესმის?

- ...

- თომა, მა, გაიგე?

- ...

ახლა ვიხსნებ, ვწერ ამას და ვფიქრობ, ნეტა მოვასწარი ამეხსნა ... თუ ღმერთზე, როგორც ცუდ მხატვარზე ფიქრში ჩაეძინა?