სამეფო კარზე გადაბარგება

[პაატა ტეტუნაშვილი]

მასხარები
III თავი

დიდმა ხელმწიფემ საცხოვრებლად თავის სასახლე შემოგვთავაზა.

ორად გაიყო მასხარების ოჯახი. მამიკო და დედიკო სიხარულით ცას ეწივნენ. სულ აქეთ-იქით პროწიალობდნენ. ჩვენ კი დავნაღვლიანდით. მშობლიური, ჰაერში გამოკიდებული ქოხი ყველა სასახლეს გვერჩია. მაგრამ რას ვიზამდით?! დედიკო და მამიკო ხომ ჩვენი მშობლები იყვნენ და უნდა დაგვეჯერებინა. გადაწყდა და მეფის კარზე გადავედით საცხოვრებლად, თუმცა ჩვენ, პატარებმა, მოვიწყინეთ.

ყურებდიდა მასხარა ყურებჩამოყრილი იჯდა და ყურებს აღარ აპარტყუნებდა. ნიკაპგრძელა მასხარასაც ნიკაპი აეკეცა და აღარ აცახცახებდა. მეც, ჩემი კაუჭა ცხვირი ჩამოვუშვი და აღარავის საქმეში აღარ ვყოფდი. ვიჯექით მოწყენილები და ჰაერში გამოკიდებული, ჩვენი დიდი ბებიის, მასხარ-ნანოს ნაწნავით მთვარის წვეტოებზე დაკიდებული, თავისუფალი სახლი გვენატრებოდა.

უცნაურად შეიცვალა ჩვენი ცხოვრება. ჯერ იყოდა ჩვენი სახლიდან თორმეტცხენა ეტლით წაგვიყვანეს.

ჩვენ ვუთხარით:

- თქვენ თუ გნებავთ ეტლით წადით, ჩვენკი პროწიალით გამოგყვებით უკან-თქო, - მაგრამ მეფის მსახურებმა ქვა ააგდეს და თავი შეუშვირეს:

- რას ამბობთ? დღეიდან სამეფო სასახლის მასხარები ხართ და ქუჩაში თქვენი პროწიალი ცოტა არ იყოს უხერხულია, აღარ შეგეფერებათო.

ბრძენი კობრაც დიდი ხვეწნა-მუდარისა და ყელის გამოწევა-ტუჩების პრუწვით ძლივს შემოვაშვებინეთ ჩვენს ეტლში. უფრო მეტიც, მოკვლაც კი დაუპირეს, ვითომც და ემანდ ხელმწიფე არ დაგესლოსო და ხმლის ვადაზე იტაცეს ხელი. მაგრამ ავწივლდით და ავკივლდით მთელი ოჯახი. სულ თავდაყირა გადავედით გაცოფებულები, მაგრამ მეფის მსახურნი არად დაგიდევდნენ ჩვენს გულისტკივილს და ხმალამოღებულები დასდევდნენ გველს მოსაკლავად.

ბოლოს ატირებულმა მსახურთუხუცესს ვკითხე:

- ნუთუ დიდმა ხელმწიფემ ბრძანა და მისი სურვილია ბრძენი გველის სიკვდილი-თქო?

- არაო, - მიპასუხა მსახურთუხუცესმა.

- მაშ რატომღა გსურთ მისი სიკვდილი თუ მეფეს არ უბრძანებია?

- იმიტომ, რომ საშიშია , ბრძენი თანაც მოლაპარაკე გველი, რომელმაც მიწის ყველა ხვრელი იცის და ყველა ღრიჭოში ძვრება სადაც თავი ეტევა. ერთ დღეს, სიბნელის საიდუმლოებების ყოვლისმცნობელმა, ყელმოღერებით რომ ამცნოს მეფეს სიბნელეში მომხდარი ამბები, განა მეფე ამით არ დაიგესლება და სასიკვდილოდ არ დაავადდებაო?

- ნუთუ დღის სინათლეზე გამოტანილი სიბნელის საიდუმლო ასე აშინებთ მეფის მსახურთო? - იკითხა ბრძენმა კობრამ, რომელიც მდევრთაგან თავის დასაღწევად გაქცეული ერთიანად ოფლში გაწუწულიყო.

- ჩვენ სიბნელის საიდუმლოს გამოაშკარავება-კი არა, მეფის მდგომარეობა გვადარდებსო - უპასუხა მსახურთუხუცესმა.

- ცრუობთ, მეფე მხოლოდ მიზეზია, - უპასუხა გველმა, - თქვენ რომ მეფის ინტერესები მართლა გადარდებდეთ, მის ბრძანებას შეასრულებდითო.

- თუ მეფის არა, მაშ ვის ბრძანებას ვასრულებთო?

- თქვენ რომ მეფის ბრძანებას ასრულებდეთ მაშინ მეფეს მასხარებს მიჰგვრიდით და არა ჯამბაზებსო.

- განა მასხარები არ მიგვყვავს მეფესთანო? - იკითხა გაოცებულმა მსახურთუხუცესმა.

- მე თუ მომკლავთ, ეგენი ხომ გველის სიბრძნის გარეშე კვლავ ჯამბაზებად გადაიქცევიანო? ჰოდა, თუ მომკლავთ არც თქვენ დაგადგებათ კარგი დღეო. - ირონიულად ჩაისისინა კობრამ და ორკაპა ენა ცინიკურად გაასარსალა.

- გამოდის, რომ შენს მოკვლაზე ხელი უნდა ავიღოთო - გულდაწყვეტით გამოცრა კბილებში მსახურთუხუცესმა

- თუ ხელს არ აიღებთ, მაშინ, მეფის ბრძანების არშესრულებისთვის ჩემს ბედს გაიზიარებთო.

დაფიქრდა მსახურთუხუცესი და მიხვდა, რომ გველი სიმართლეს ეუბნებოდა. ცოტა არ იყოს შეშინდა კიდეც, რადგან კარგად მოეხსენებოდა მრისხანე მეფის ამბავი. ამასთან ჩვენი ხვეწნა- მუდარა, ყელის გამოწევა და სამართლიანი მოთხოვნაც ზედ დავურთეთ გველის მსჯელობის დამარწმუნებელ არგუმენტებს და რაღას იზამდნენ?! ჩასვეს გველიც თორმეტცხენა ეტლში და ისიც ჩვენთან ერთად გამოამგზავრეს ხელმწიფის სასახლისკენ.

◄ წინა ნაწილი

გაგრძელება ►

[პაატა ტეტუნაშვილი]

1. რა ბრძენია ეს კობრა-  "სიბნელის საიდუმლოებების  ყოვლისმცნობელი". -ნუთუ  დღის სინათლეზე გამოტანილი სიბნელის საიდუმლო ასე აშინებთ მეფის მსახურთო? კარგად იკითხება. jonatan livingstoni. 2012-08-27 21:48:30 2.       ჯერ მარიობას გილოცავთყველას და წმინდა მარიამის მადლი შეგეწიოთ ყველას.           ახლა ნაწარმოებს მივხედოთ.ძალიან მაწყენინე,ჩემო კარგო.შწორია თოლია;-კობრაც ბრძენია და კარგადაც იკითხება...კიდევ ბევრ კაი-კაი რამე-რუმეებსაც დავუმატებდი ასე გულგატეხილი რომ არ დაგეტოვებინე.           ჰოდა იცოდე აწი ასეთ მოცუცქნულ რაიმეს მომაწოდებ წასაკითხად...           ვაი-მე და ვაი შენი ბრალი.იმნაირს მოვუყვები შენზე თქვენს დიდ ხელმწიფეს-სახელმწიფოში კიარა დედამიწიდან გადაგყაროს იქნება...           მაგრამ ამ ერთხელ იყოს ეგრე.და რა ნაწერიცაა ისე შეგაფასებთ...                       ჩემი მოკრძალებული მაქსიმუმი მასხარას. ბენჟამენი. 2012-08-28 07:28:46 3. - მე  თუ  მომკლავთ, ეგენი ხომ  გველის სიბრძნის გარეშე კვლავ ჯამბაზებად გადაიქცევიანო?                                   ბრძენთა ბრძენი გველი...:-* იხ. ილუსტრაცია...მასხარ- ნანოს ცნობილი ნაწნავი...:))                                ჭა. 2012-08-28 10:16:49 4. +++++ ია ჯიათელი. 2012-08-28 23:10:59 5. ბევრად ნაჯახირები კი ხართ მთელი ოჯახი. ჩემი და შეფთისა არ იყოს. ჩვენ მშობლები არა გვყოლია, ერთი ბიძა გვყავდა მყვინთავი სერგი,მადერაზე. ეგ იყო და ეგ. იმიტომაც დავფრენ-ხვრინაობდით საითაც მოგვესურვებოდა იქით. მხვრინავი ეშლი. 2012-08-30 02:14:43 6. ჰო,  ჩემო მხვრინავო მეგობარო. ალბათ ასეთია  თავგადასავლების მაძიებელთა ბედი. შეფთი და ბიძია მყვინთავი სერგი მომიკითხე :-* მასხარა1. 2012-09-01 14:15:01 7. ნეტა როდის დაიწყებენ "ნორმალურ" ცხოვრებას, როდის გადახდებათ ნამდვილი ფათერაკები თუ თავგადასავლები? კახა გრძელიშვილი. 2012-09-01 14:15:53 8. ვ ე ლ ო დ ე ბ ი    ა ხ ა ლ ს ! ი მ ი ტ ო მ  რ ო მ    წ  ი ნ ა    ნ ა წ ე რ ე ბ ი  მ ო მ ე წ ო ნ ა ! ნეფერტარი. 2012-09-07 14:56:59 9. ტუჩების  პრუწვითძლივს  შემოვაშვებინეთ. ორკაპა  ენა ცინიკურად  გაასარსალა. სამართლიანი  მოთხოვნა. რა  ორიგინალურად  გაქვს    სიმართლე  ჩამჯდარი  იუმორში. მუხა. 2012-09-10 20:54:13

[ლაშა]

მოკლედ, ჯერ სულ რაღაც სამი თავი წავიკითხე და ცოტა დაბნეულობაში ვარ :) 

რატომაა ეს საბავშვო მოთხრობა??? და თუ საბავშვოა, რატომ მსიამოვნებს ასე ძალიან მისი წაკითხვა უკვე დიდი ხნის ბავშვობიდან გამოსულს? :) :) 

[პაატა ტეტუნაშვილი]

იქნებ ლამაზად და უმტკივნეულოდ გაბრუნებს, ლაშა, ბავშვობაში?:) :) 

[ლაშა]

პაატა შეიძლება ასეცაა :) აი, ამაღამ დარჩენილ ნაწილებსაც წავიკითხავ და შემდეგ უფრო მკაფიოდ დავაფიქსირებ აზრს :))