შუასაუკუნეობრივი დაპირისპირება, ამერიკული გვერდშიდგომა, დაუსწრებელი სასამართლო, მბრალდებლის ბოლო სიტყვა და ანონსები

[Giorgi]

      მთაწმინდა ჩაფიქრებულა და ცისკრის ვარსკვლავის ნაცვლად, საკუთარ გუშინდელ მცხუნვარებას იხსენებდა და ერთობ დაღონებული აპირ... - არა, ცხადია პროზაულ ნიუსებს არ შემოგთავაზებთ, უბრალოდ, დილიდან ვრცელდებოდა მთაწმინდის დამწვარი ფერდობები და მეც გული დამეწვა. მაგრამ მაინც:

საქართველოს და მსოფლიოს ამბები /10 აგვისტო, 2017/

      ერთ-ერთი პირველი ნიუსი იყო, ხობელების და ზუგდიდელების დაპირისპირების ამბავი, ეს ორი მეზობელი, არც მეტი, არც ნაკლები, ღმრთისმშობლის კვართის გამო კინაღამ წაკინკლავდნენ - მეუფე ვახტანგი - კვართის ხობის მონასტერში ერთი დღით გადატანაზე გადაწყვეტილებას პატრიარქი მიიღებს. ზუგდიდის მერი - ღვთისმშობელი თვითონ ირჩევს, სად იყოს დაბრძანებული მისი სამოსელი და მისი ნების გარეშე ვერანაირი ძალა ვერ დაძრავს კვართს. კულტურის სამინისტრო ღვთისმშობლის კვართის გადაბრძანებასთან დაკავშირებით საპატრიარქოს გადაწყვეტილებას ელოდება.

      შესაშური მოწოდება ისმის ამერიკისგან - აშშ-ს სახელმწიფო დეპარტამენტი რუსეთს მოუწოდებს, აფხაზეთისა და „სამხრეთ ოსეთის“ აღიარება გააუქმოს. თამარ ხულორდავა - სახელმწიფო დეპარტამენტის განცხადება რუსეთისთვის ღია მინიშნებაა, რომ საქართველო არ არის მარტო მისი აგრესიის პირისპირ. ქეთევან ციხელაშვილი - აშშ-ს სახელმწიფო დეპარტამენტი პუტინის აფხაზეთში ვიზიტს აფასებს, როგორც განგრძობადი ოკუპაციის პოლიტიკის ერთ-ერთ ნაბიჯს. ირაკლი კობახიძე - აშშ-ის სახელმწიფო დეპარტამენტის განცხადება საქართველოს ტერიტორიული მთლიანობის და სუვერენიტეტის მხარდაჭერის დემონსტრირებაა.

      აქ არა შემოჰყოლიაო - დღესვე - რუსმა ოკუპანტებმა საოკუპაციო ხაზზე კიდევ ერთი პირი დააკავეს. მოგვიანებთ, საოკუპაციო ხაზზე დაკავებული უტა სამუშია გაათავისუფლეს.

      პატრიოტიზმი პრობლემური ცნება გახდა - გიგლა ბარამიძე - აფხაზ და ოს ხალხს რომ შევხვდეთ, ჩვენ ვართ პრორუსები, ხალხის მტერი და სესიაშვილი და იზორია არიან პატრიოტები?! ნინო ბურჯანაძე - საქართველოში ჩავალ საქართველოდან, აფხაზეთიც და ოსეთიც საქართველოა.

      მთაწმინდის გარდა, პრობლემა ჰქონდა გუშინ აეროპორტსაც - პროგრამული ხარვეზის გამო, თბილისის საერთაშორისო აეროპორტიდან ღამის განმავლობაში 8 ავიარეისი დაგვიანებით შესრულდა. ამის ფონზე, ეს ნიუსი შვებაა - საქართველოს ავიაციის უნივერსიტეტში ახალი პროგრამები ამოქმედდება. გიორგი გახარია - პრობლემა მხოლოდ თბილისის აეროპორტში არ არის, ის არის უფრო გლობალური.

      ნეტავ გამაგებინა ამათ რაღა უნდათ, იმ კაცს არ უნდა საქართველო და თბილისი და - თბილისის საქალაქო სასამართლოსთან მიხეილ სააკაშვილის მხარდამჭერი აქცია იმართება. დღეს პიჯაკების საქმე იყო. ე.წ. პიჯაკების საქმეზე სდსს-ს ის ყოფილი თანამშრომელი დაიკითხა, რომელიც დოქტორ დოტის ვიზიტისას მის უსაფრთხოებაზე ზრუნავდა. თემურ ჯანაშია - დოქტორ დოტის დაკითხვაზე ინფორმაცია საერთოდ "ღადაობაა". პროკურორი - ბოტოქსის, ეპილაციის და მეგობრებისთვის საჩუქრების ხარჯების გასაიდუმლოება მიხეილ სააკაშვილმა საზოგადოების აღშფოთების შემდეგ გადაწყვიტა. მოსამართლემ ბარაქ ობამას შვებულების ხარჯებთან დაკავშირებული მასალა ე.წ. პიჯაკების საქმეს მტკიცებულებად არ დაურთო. უკრაინის საგარეო უწყება - სააკაშვილის გადაადგილებას უცხოელ პარტნიორებთან არ განვიხილავთ, მითუმეტეს, ვინ იცის, ხვალ სად აღმოჩნდება ის.

      ციანიდის საქმის მბრალდებლები დეკანოზყოფილ გიორგი მამალაძეს ციხეში ისტუმრებენ - ე.წ. ციანიდის საქმის პროკურორი - ვარწმუნებთ საზოგადოებას, რომ მოსამართლე გამოიტანს სწორ გადაწყვეტილებას და გიორგი მამალაძეს სცნობს დამნაშავედ. მიხეილ რამიშვილი - ვერც ერთი მოწმის ჩვენებით ვერ დასტურდება, რომ მამა გიორგის მიერ დანაშაული მზადდებოდა. დღესვე, ე.წ. ციანიდის საქმეზე ბრალდების მხარე სასამართლოს წინაშე დასკვნითი სიტყვით წარსდგა. დეკანოზ გიორგი მამალაძის ადვოკატი - ბრალდების დასკვნითი სიტყვა უსუსური იყო და მტკიცებულებებიდან არ გამომდინარეობდა.

      რუსიფიკაციის პოლიტიკა - ქეთევან ციხელაშვილი - მინიშნება, რომ ახალგორის ქართული სკოლები რუსულ სწავლებაზე გადავიდეს, რუსიფიკაციის პოლიტიკის შემდგომი ნაბიჯია.

      გამსახურდიამ, დაზარებულობა მინდა - ცოტნე გამსახურდია პროკურატურისგან ზვიად გამსახურდიას საქმეში დაზარალებულად ცნობას ითხოვს.

      კარგი სუფრა გაიშლებაო, ალბათ ფიქრობს - რომან გოცირიძე მთავრობას - ხელისუფლება რომ შეიცვლება, მწვადებს დაგითვლით.

      მაინც, ყოველი შემთხვევისთვის? - გიორგი კვირიკაშვილის აზრით, საგანგებო სიტუაციების მართვის სააგენტო კიდევ უფრო უნდა გაძლიერდეს. თემურ გიორგაძე - საგანგებო სიტუაციების სამსახურის გასაძლიერებლად პირველ რიგში, ვერტმფრენები უნდა შეიძინონ.

      ფეხბურთიდან მინისტრობაში, კალათბურთიდან პარალელურად PR-ში - ზაზა ფაჩულია „თიბისი ბანკთან“ ერთად ბიზნესის წამოწყების პოპულარიზაციას შეუწყობს ხელს.

შავი ზღვის არენაზე - Black Sea Arena რომ ჰქვია რატომრაც, ანონსდება:

• 15 აგვისტო, 20 საათი - ირაკლი ჩარკვიანი - ”ისტორია”;
• 18 აგვისტო, 19 საათი - GIPSY KINGS;
• 21 აგვისტო, 19 საათი - ნინო ქათამაძე;
• 2 სექტემბერი, 19 საათი - LA MONETA & FLAMENCO ესპანეთიდან.

საზღვარგარეთულები:

      ამერიკა კორეას უჩიჩხინებს - აშშ-ის თავდაცვის უწყებამ ჩრდილოეთ კორეაში სამხედრო ობიექტებზე პრევენციული დარტყმების გეგმა შეიმუშავა.

      ეს ამერიკა რამდენად უნდა გაიჭრას - ვენესუელას ხელისუფლება არ სცნობს ახალ შემზღუდავ ზომებს, რომელიც ვაშინგტონმა ქვეყანას დაუწესა.

წყაროები: ქართული ინტერნეტ საინფორმაციო პორტალები

◄ წინადღის ამბები

მომდევნო დღე ►

[ხათუნა]

საზღვარგარეთულები: :)))