პიცა ჰარმონია

[ლაშა]

      გადატვირთული საახალწლო დღეები შემდეგ, რამე მსუბუქი და სასიამოვნო აუცილებლად მოგინდებათ. თხელ-თხელ ცომზე, მსუბუქად მოლაგებული ბოსტნეული ამის გარანტია. სახელწოდების არ იყოს, ნამდვილად ჰარმონიულად დაამშვენებს თქვენს ნაახალწლევ განწყობას.

შემადგენლობა:

• პიცის სოუსი - გემოვნებით მაიონეზი – 200 გრ.
• სოკო - 200 გრ.
• პომიდორი - 2 ცალი
• მწვანე ბულგარული წიწაკა - 1 ცალი
• ზეთისხილი - 50 გრ.
• მდოგვი - გემოვნებით

ცომისთვის:

• ფქვილი - 350 გრ.
• საფუარი - 2 ჩ.კ.
• წყალი - 200 მლ.
• ზეითუნის ზეთი - 3 ს.კ.
• მარილი - 1 მწიკვი
• შაქარი - 1 მწიკვი

პიცის სოუსისთვის:

• პომიდვრის სოუსი - 400 გრ.
• ტომატი - 170 გრ.
• დაფქული ორეგანო - 1 ს.კ.
• დაქუცმაცებული ნიორი - 1/2 ჩ.კ.
• დაფქული წიწაკა - 1 ჩ.კ.

მომზადება:

      ფქვილი გაცერით, დაამატეთ საფუარი, მარილი და შაქარი. ჩაასხით წყალი, დაამატეთ ზეითუნის ზეთი და კარგად მოზილეთ. მოათავსეთ ცომი ჯამში, გადააფარეთ თბილი ქსოვილი და დატოვეთ 1 საათით. როცა ცომი ამოვა, კიდევ ერთხელ კარგად მოზილეთ 2-3 წუთის განმავლობაში.

      მოამზადეთ პიცის სოუსი: მოათავსეთ სოუსის ინგრედიენტები თასში და კარგად აურიეთ.

      გააბრტყელეთ ცომი წრის ფორმაზე, წაუსვით პიცის სოუსი, მაიონეზი, დააწყეთ სოკო, კუბებად დაჭრილი პომიდორი, ბულგარული წიწაკა, ზეთისხილი, მოასხით მდოგვი და მოათავსეთ ღუმელში გამოსაცხობად.